Усё менш дзён застаецца да свята «Я родам са Стойлаў», прызначанага на 24 мая. Пушчанская вёсачка з адным-адзінюткім жыхаром прыхарошваецца перад урачыстасцю. Даводзяцца апошнія штрыхі на пяціметровым дубовым крыжы, што паўстане на ўездзе. Сакральны сімвал вёскі з’яўляецца аўтарскай работай разьбяроў з Кобрыншчыны – народнага майстра РБ Уладзіміра Чыквіна і Вячаслава Дароцькі. Сакральны сімвал паўстаў якраз у дзень нараджэння адзінага стойлаўца – Мікалая Тарасюка, якому 8 мая споўнілася 82 гады.
Створана гісторыка-этнаграфічная карта Стойлаў. На адным яе баку – пададзеная ў мастацкім ключы планіроўка населенага пункта сярэдзіны мінулага стагоддзя (мастацкае рашэнне Марыі Радзько). На адваротным баку – фотаздымкі вяскоўцаў. Нанесеная на трывалы матэрыял, карта зойме месца побач з паклонным крыжам і стане сапраўднай візітоўкай вёскі. Арганізатары свята заручыліся згодай шэрага аўтэнтычных калектываў на ўдзел у канцэрце пад адкрытым небам. Сярод іх – гурты «Рада» і «Старое сяло» з Мінска, «Жэмэрва» з Падляшша (Польшча), знакамітыя «Хмелеўскія валацугі» з Жабінкаўскага раёна і гурт «Бабіна лета» з Пружаншчыны.
Не застаўся ў баку ад перадсвяточных клопатаў і славуты разьбяр Мікалай Тарасюк. Ля ўласнай сядзібы ён таксама ўсталяваў паклонны крыж, выкананы ў характэрнай для майстра манеры.
Вышэйзгаданыя мерапрыемствы праходзяць у рамках праекта «Вясковы рэнесанс». Яго рэалізуе аддзел ідэалагічнай работы, культуры і па справах моладзі Пружанскага райвыканкама пры фінансавай падтрымцы беларускага прадстаўніцтва «Нямецкай асацыяцыі народных універсітэтаў».
