Берасцейцы ніяк не праявілі сябе на рэспубліканскай алімпіядзе па роднай мове
Брэсцкі абласны
ліцэй стаў месцам, дзе ў мінулую пятніцу аб´явілі вынікі рэспубліканскай
алімпіяды па роднай мове і літаратуры. За званне найлепшага змагаліся 122 школьнікі з беларускіх навучальных устаноў і 5
прадстаўнікоў беларускамоўных
навучальных устаноў Польшчы і Літвы. Здавалася, што менавіта тут і цяпер сабралася
моладзь, назаўжды адданая мове, якая прызнана «другой па мілагучнасці пасля
італьянскай у свеце».
Яны выходзілі з актавай залы з
падарункамі і размаўлялі пераважна па-руску. І гэта былі тыя, хто заўсёды з
захапленнем чытае на ўроках вершы Багдановіча, хто беспамылкова піша дыктоўкі,
хто дзякуючы менавіта гэтаму імпэту быў выбраны «ад школы», «ад раёна», «ад
вобласці» на самае сур´ёзнае па мерках краіны інтэлектуальнае спаборніцтва. У
іх вачах ніякай рамантыкі. Што казаць, моладзь сёння значна больш прагматычная,чым мы ўяўляем. Вядомая ж рэч:
«магічны» дыплом пераможцы рэспубліканскай алімпіяды дае права на залік без
уступных іспытаў у любую вышэйшую навучальную ўстанову краіны на профільную
спецыяльнасць. Мажліва, са здзяйсненнем мары абітурыента прыходзіць і канец любові
да мовы. Па звестках БелаПАН са спасылкай на Белстат, толькі 0,2 % студэнтаў, якія
атрымаюць вышэйшую адукацыю ў гэтым навучальным годзе, гавораць са сваімі
лектарамі толькі на беларускай мове. Сярод навучэнцаў сярэдніх спецыяльных устаноў
у беларускамоўных стасунках знаходзяцца 0,9 % слухачоў, агульная сярэдняя
адукацыя дае лічбу 16,4 %, а ў дзіцячых садках 45 тысяч дашкольнікаў (каля 11,4
%) слухаюць казкі, напісаныя па-беларуску. Колькасць беларускамоўных
«дыназаўраў» (малых і сталых) з кожным годам памяншаецца, і тое, якую мову мы
ўжываем як сваю, з´яўляецца лакмусавай паперкай гэтай тэндэнцыі. Глядзіце самі:
паводле перапісу 1999 года, 73,7 % жыхароў краіны назвалі беларускую мову
роднай, а ў 2009-м – ужо 53,2 %. Калі ў 1999-м дома па-беларуску размаўлялі
36,7 % беларусаў, то ў 2009 – 23,4 %.
Але вернемся да алімпіяды. Наша
вобласць, мякка кажучы, выступіла так сабе. А калі шчыра, то вельмі дрэнна: на ўрачыстай
частцы прозвішчы прадстаўнікоў Брэстчыны загучалі са сцэны толькі тады, калі пачалі
раздаваць дыпломы трэцяй ступені.
Вось нашы перадавікі: Яніна
Прыбытка з брэсцкай сярэдняй школы № 29 (9 клас), Мар´я Янковіч з пінскай школы
№ 15 (11 клас) і Паліна Кушчанка, дзесяцікласніца пінскай школы № 12. Акрамя
таго, дзевяцікласніца Беражноўскай сярэдняй школы Столінскага раёна Ганна
Піліпчук атрымала грамату як лепшы сельскі вучань. Усяго ў алімпіядзе прынялі
ўдзел 20 чалавек з нашай вобласці.
Мы папрасілі даць характарыстыку
нашай камандзе і прааналізаваць вынікі апошняй «пяцігодкі» Ірыну Булаўкіну,
вядучага спецыяліста ўпраўлення агульнай сярэдняй адукацыі Міністэрства
адукацыі, яна ўваходзіла ў склад журы і, як кажуць, зазірнула кожнаму ў вочы.
Ірына Уладзіміраўна, абыходзячы вострыя акадэмічныя вуглы, выказала агульную
думку камісіі, што моладзь з нашай вобласці вызначалася культурнай
адукаванасцю, інтэлігентнасцю, ветлівасцю. Нават позірк быў іншым: вочы
ўсміхаліся. А што датычыцца аптымізацыі навучальнага працэсу, то Ірына
Булаўкіна раіць нам браць прыклад з Магілёўскай вобласці. Тамтэйшыя школы
супрацоўнічаюць з выкладчыкамі ВНУ, запрашаюць навуковыя кадры на дыскусіі,
лекцыі. Такая інтэрактыўнасць, на думку спецыяліста, павышае прэстыж навукі для
вучняў, закладвае любоў да ведаў – дзеля ведаў і асабістага развіцця, а не
толькі каб паспяхова прыняць удзел у алімпіядах і – «пераскочыць» сяброў у час
уступнай кампаніі.
Сёння ў Брэсце адзін
беларускамоўны клас – у сярэдняй школе № 34, вучацца ў ім пяць дзетак
(заканчваюць другі клас). Гімназія № 3 таксама лічыцца беларускамоўнай, але цалкам
на мове заняткі праводзяцца только ў пачатковай школе. На гэтым беларускамоўная
агульная сярэдняя адукацыя заканчваецца. На абласным узроўні лічбы гучаць больш
аптымістычна: 55 % школ маюць беларускамоўнае выкладанне. Але большасць з іх –
сельскія, малыя школы. Калі мы калупнём тую ж самую статыстыку з боку колькасці
вучняў, то паўстае зусім іншая карціна: толькі 22,9 працэнта дзяўчат і хлопцаў вучацца
па-беларуску. Бацькі не жадаюць аддаваць сваіх дзяцей у беларускамоўныя школы,
бо ў тым, на іх думку, няма рацыі: газеты, тэлебачанне, праграмы ў школах і ва
ўніверсітэтах, прыём у паліклініцы – мы атрымліваем інфармацыю ў асноўным
па-руску.
А што ў суседзяў?
Ян Карчэўскі, выкладчык беларускай мовы і літаратуры (комплекс школ з
дададковым вывучаннем беларускай мовы ў Гайнаўцы, Польшча):
– У нас
працуюць гімназія і агульнаадукацыйны ліцэй. У гімназіі маем тры гадзіны
беларускай мовы і літаратуры на тыдні, у ліцэі – чатыры. У гімназіі тры паралелі, у
кожнай па 2-3 класы, прыкладна тая ж
карціна ў ліцэі. Кадры рыхтуюць беларуская філалогія ў Варшаве і ўніверсітэт у
Беластоку.
Лічба «ВБ»:
У 2011 годзе ў Беларусі было выдадзена больш за 11 тысяч кніг і брашур агульным тыражом 34,3 мільёна экзэмпляраў. З іх 9 працэнтаў – на беларускай мове.
Портал ivest.kz - база частных объявлений газеты «Информ Вест», справочник предприятий городов Казахстана и
России, новости, недвижимость, электронные версии ряда изданий, сборник кулинарных рецептов. Все замечания и
предложения принимаются на info@ivest.kz.
Использование данного веб-портала подразумевает ваше согласие с
Правилами пользования.