Правила пользования

«Беларусь атынан сынға түскен қазақ қызы әлем чемпионы атанды»

Дата: 10.03.15 в 09:15
Мобильная версия Шрифт
Қазақстанда туған Динара Әлімбекова Беларусь жастар құрамасының сапында биатлоннан жастар арасындағы әлем чемпионатында алтын алды.

 Беларусь атынан сынға түскен қазақ қызы әлем чемпионы атанды
Беларусь атынан сынға түскен қазақ қызы әлем чемпионы атанды
Минскіден 20 шақырымдай жерде орналасқан Раубичи қалашығында өткен жасөспірімдер арасындағы әлем чемпионатында Беларусь қыздар құрамасы 3х6 километрлік эстафетада алтын алды.

Әлем чемпионы атанған Беларусь құрамасының сапында бұрынғы қазақстандық Динара Әлімбекова да болды. Жарыстан кейін Беларусь жастар құрамасының жаттықтырушысы Василий Большаков "бұл – тарихи жеңіс" деп бағалады. Беларусь бұған дейін 2009 жылғы әлем чемпионатының эстафетасында - қола, 2010 жылы әлем біріншілігінде күміс алған еді.

Биатлоннан Беларусьтің негізгі олимпиадалық құрамасын бес жылдан астам уақыт жаттықтырып келе жатқан бапкер Андриан Цибульский Динара Әлімбекованы "болашағы бар әрі ұлттық құрамадағы биатлоншылардың ізбасары" деп бағалады.

19 жастағы Динара Әлімбекова Қазақстанның Абай қаласында туған. Үш жасында отбасымен Беларуське көшіп кеткен. Ол Қазақстанға жеті жасында атасымен бір рет келген. Одан кейін бұл елге жолы түспепті.

"Әкем – қазақ, анам – орыс. Үш-төрт жасымда ата-анам Беларусьтен жұмыс тауып, сол жаққа көшкен. Қазір Чаусы қаласында оқимын әрі жаттығамын. Анам бір мекемеде есепші болып жұмыс істейді. Әкеммен бірге тұрмаймыз" деді ол.

Динара спортқа келмес бұрын музыка мектебінде пианино класында оқыған. 2007 жылы 11 жасқа толғанда дене шынықтыру мұғалімінің ұсынысымен шаңғы спортымен айналыса бастапты. 2008 жылы Чаусыдағы спорт мектептерінің біріне түсіп, шаңғы тебумен қатар винтовкадан атуға машықтанады.

"Музыкадан бірден спортқа ауыса алмадым. Екеуін қатар ұстауға тырысып, жарысқа ноталарымды ала кететінмін. Қазір де пианино ойнаймын, нота ұмытқан жоқпын" дейді ол.

2011 жылы Динара Беларусь жасөпірімдер құрамасына шақырту алады. Кейін бірнеше еуропалық және халықаралық жарыстарға қатысқан. Биыл жастар арасындағы Беларусь чемпионатында жекелей жарыста - күміс, із қуып жарысу мен спринтте қола алған.

Ал Раубичидегі жастар арасындағы әлем чемпионатында алғаш рет халықаралық деңгейдегі алтын медалін иеленді.

"Раубичиде ату кезінде біраз қателік жібердім. Бірақ шаңғымен жүгіруде жылдам болдым. Командаласыма эстафетаны үшінші болып тапсырдым. Бірақ бірінші және екінші орындағы қарсыластарымнан тек екі-үш секундқа қалдым" дейді спортшы Азаттық тілшісіне.

Динара Әлімбекова Беларусь жастар құрамасының толық мүшесі ретінде мемлекеттен қаржылай көмек те алатынын айтады.

Ол тарихи отанына оралуы жағын әлі ойланбағанын, болашақта Беларусь құрамасының сапында жарыстарға қатысуды жоспарлайтынын жеткізді.

"Еш мемлекеттен ұсыныс түскен жоқ. Қазақстан да шақырмады. Шақырмаған соң бұл туралы ойламаппын. Беларусьте биатлонмен айналысуға мүмкіндік мол. Спортшы ретінде президенттік стипендия да аламын. Беларусьте барлық жағдай бар, сондықтан басқа елге кету жайын ойламаппын" деді биатлоншы.

Беларусь жанкүйерлері әлеуметтік желілерде Динара Әлімбекованы болашақта Сочи олимпиадасының үш дүркін чемпионы, әлем чемпионатында екі алтын, әлем кубогында 27 алтын алған "Беларусь қаһарманы" Дарья Домрачеваның ізін басады дегенге ұқсас мақтау білдіре бастады.

 


Источник: http://news.nur.kz/358931.html
Просмотров: 86


Комментариев: 0
Праздникиbur_grey_up
О компании О проекте Источники новостей Предложить ленту Реклама на сайте Реклама в газете Контакты Наши партнеры
Портал ivest.kz - база частных объявлений газеты «Информ Вест», справочник предприятий городов Казахстана и России, новости, недвижимость, электронные версии ряда изданий, сборник кулинарных рецептов. Все замечания и предложения принимаются на info@ivest.kz.
Использование данного веб-портала подразумевает ваше согласие с Правилами пользования.
© 2000-2018 «Информ Вест»
Рейтинг@Mail.ru