5 мая ў абласной
бібліятэцы імя Горкага адбылася сустрэча са старшынёй Брэсцкага аблвыканкама
Канстанцінам Сумарам. Кіраўнік вобласці пагутарыў з чытачамі - навучэнцамі
абласнога ліцэя імя П.М. Машэрава, адказаў на шматлікія пытанні.
Такім чынам распачалася
акцыя «Чытаем верш па-беларуску», прымеркаваная да 70-годдзя вызвалення
Беларусі ад нямецка-фашысцкіх захопнікаў. На працягу месяца суразмоўцамі
чытачоў будуць вядомыя людзі Брэстчыны. Кожны з гасцей прачытае абраны ім верш
на беларускай мове, прысвечаны тэме Вялікай Айчыннай вайны. Канстанцін Сумар
прапанаваў увазе слухачоў верш Петруся Броўкі «Крэпасць над Бугам», напісаны ў
1964 годзе. Працягваючы закранутую тэму Брэсцкай крэпасці, губернатар
праінфармаваў маладых людзей, як улада мяркуе даць ёй новае жыццё. «Наша
канцэпцыя, - сказаў ён, - заключаецца ў тым, каб захаваць для нашчадкаў у
некранутым выглядзе мемарыяльны комплекс. Астатняя тэрыторыя крэпасці будзе
насычана сучаснымі аб´ектамі культуры і турыстычнай інфраструктурай». Ліцэісты,
у сваю чаргу, дэкламавалі вершы Пімена Панчанкі і Аркадзя Куляшова, многім
знаёмыя яшчэ са школьных часоў.
Дырэктар установы Тамара
Данілюк засяродзіла увагу губернатара на неабходнасці капітальнага рамонту найбуйнейшай
бібліятэкі вобласці, кніжны фонд якой з цяжкасцю месціцца ў старым будынку.
Супрацоўнікі мараць таксама аб стварэнні аддзела рэдкай кнігі, для якога ўжо сёе-тое
сабрана. Канстанцін Сумар пагадзіўся, што да гэтага пытання трэба падступацца,
і нават ацаніў прыблізны кошт рэканструкцыі храма кнігі (а ён даволі
ўнушальны).
Цікавая гутарка чакае
чытачоў бібліятэкі і з тымі гасцямі, якія сюды наведаюцца ў бліжэйшыя дні. У іх
ліку пракурор вобласці Іван Наскевіч, старшы інспектар мытнага паста «Брэст-Цэнтральны»
Анатоль Брытун, пісьменнік Алесь Каско, прафесар Мечыслаў Часноўскі.