Усё бліжэй калядныя і навагоднія святы. І калі вам здаецца, што нічога новага да іх прыдумаць нельга, то гэта не так. Выстава ў музеі «Выратаваныя мастацкія каштоўнасці» пацвярджае такую думку.
Гістарычны музей Кракава, Генеральнае консульства Рэспублікі Польшча ў Брэсце і Польскі Інстытут у Мінску падрыхтавалі выставу «Кракаўскія калядныя батлейкі». Экспазіцыя адкрыецца ў названым музеі 13 снежня а 16-й гадзіне і будзе доўжыцца месяц.
Батлейка - гэта народны тэатр лялек на рэлігійную і бытавую тэму, адзін са старадаўніх відаў мастацтва. На дадзенай выставе будуць прадстаўлены батлейкі з фондаў гістарычнага музея Кракава. Яны адзначаны найвышэйшымі ўзнагародамі, адзначаюць арганізатары. Асаблівасцю кракаўскіх батлеек з'яўляюцца сцэны з каралямі і нацыянальнымі героямі, заслужанымі дзеячамі. Цікавасці выставе дадаюць складаныя механізмы і музычныя прыстасаванні. Таксама нельга не захапіцца аздобленымі сцэнамі Божага Нараджэння з паказам архітэктурных адметнасцей славутага польскага горада.
Супрацоўнікі музея ўпэўнены, што наведвальнікаў - дарослых і дзяцей - чакае непаўторная атмасфера цеплыні і радасці. Дарэчы, месяц таму Кракаўскія батлейкі былі ўнесены ЮНЕСКА ў спіс нематэрыяльнай культурнай спадчыны чалавецтва.
|