Калегі-пісьменнікі называлі аўтара філасафічных і лірычных вершаў «сціплым паэтычным рупліўцам». Яго пяру належаць паэтычныя зборнікі «Ранішні госць», «Даніна», «Вечны бор» і інш. Паэт перакладаў на беларускую мову творы украінскіх, расійскіх і балгарскіх пісьменнікаў.
Васіль Сахарчук нарадзіўся ў вёсцы Свадзьбічы Бярозаўскага раёна, скончыў філалагічны факультэт БДУ. Член Саюза пісьменнікаў Беларусі. Працаваў настаўнікам, а затым працяглы час - журналістам у жабінкаўскай раённай газеце «Сельская праўда», дзе кіраваў літаб'яднаннем «Плынь». Апекаваўся таленавітымі аўтарамі, яго намаганнямі быў выдадзены зборнік вершаў Васіля Гадулькі «Кропля сонца». Паэта не стала ў 2003 годзе. За няпоўныя 50 гадоў жыцця ён пакінуў прыкметную літаратурную спадчыну. Землякі ўшанавалі паэта, у 2009 годзе назваўшы яго імем адну з вуліц райцэнтра.
У вечарыне, прысвечанай памяці Васіля Сахарчука, бралі удзел сябры-пісьменнікі, былыя калегі. Прачулена гучалі вершы:
«Асядлайце мне, хлопцы, такога каня,
Што ні разу не быў пад сядлом.
Мо на ім дасягну я да светлага дня,
Ці памру пад яго капытом».
|