Ресей 1,5 жылдың ішінде IT мамандарын даярлап, қолдарына диплом ұстатпақшы. Ал Қазақстанның бір жарым жылдың ішінде IT мамандарын дайындауға мүмкіндігі бар ма? Жалпы бұл саланы аз уақыттың ішінде меңгеуге бол ма? Today.kz мамандардың пікірін білді.
"IT мамандағы деген өте кең түсінік қой. Негізі оны толық меңгеру үшін 4 жыл да аз. Бірақ алғашқы junior программист болу үшін бір жарым жыл оқыса жетеді. Қалғанын жұмыс барысында үйреніп алады", - дейді IT маман Данияр Мұқанов.
Еліміздегі мықты IT мамандарды даярлайтын жоғары оқу орындарының бірі Сүлейман Демирел атындағы университеттің ректоры Қанат Қожахметов әлеуметтік желідегі парақшасына былай жазыпты:
"Негізі студенттер бұл мамандықты 2 жылдың ішінде меңгеріп шыға алады. Бірақ ол үшін мектеп кезінде осы салаға мықтап дайындалуы керек. Мұндай жылдамдыққа анау-мынау студенттер шыдай алмайды", - дейді ол.
Жаңа технологияларды меңгеру, олармен жұмыс істеу бүгінгі таңда тек Қазақстан үшін ғана емес әлем үшін де маңызды. Нұрсұлтан Назарбаев биылғы жолдауында жаңа технологияларды меңгерудің маңыздылығына ерекше тоқталып өтті. Жаңа технологияның тілін түсініп, құлағында ойнайтын жас маман бағалы. Өйткені қай елдің болмасын экономикасын алға жетелейтін жаңа технология екені жасырын емес.