16 верасня на фестывалі «Камяніца» (пас. Азярцо Мінскі раён) ладзіцца канцэрт «Аўтэнтычныя спевы Палесся». Беларускі фестываль фальклорнай музыкі на свежым паветры праходзіць тут, у музеі беларускай народнай архітэктуры і побыту, з 2009 года. Задумка не мяняецца: са сцэны гучаць песні ў выкананні сапраўдных жыхароў рэгіёнаў. Сёлета ў свяце прымаюць удзел і берасцейцы.
На сцэну выйшлі два калектывы з Брэсцкай вобласці. Гэта дуэт Еўдакіі Зіновіч і Фёдара Булыгі. Яны жывуць у вёсцы Вулька Драгічынскага раёна. У сваю чаргу трыа «Чабатухі» у складзе Надзеі Шылавец, Венеры Пакіпіч і Антаніны Бобрык прадстаўляюць вёску Сташаны Пінскага раёна.
Як паведамілі арганізатары, наймаладзейшай удзельніцы канцэрта 63 гады, найстарэйшай - 80. Усе яны самабытныя артысты, вучыліся спяваць ад сваіх бацькоў, дзядоў і бабуль. Ведаюць сотні песень. Аснову рэпертуара складаюць абрадавыя песні, а таксама лірычныя і бяседныя, прыпеўкі.
Квіткі (па папярэдніх коштах) - 10 рублёў. Па задумцы, фестываль з'яўляецца дабрачынным. Усе сабраныя сродкі ідуць на патрэбы вышэйназванага музея.
|